Azərbaycan və Gürcüstan arasında dövlət sərhədində sıxlığın aradan qaldırılması müzakirə edilib.

Oxu.Az xəbər verir ki, bu barədə Dövlət Gömrük Komitəsi məlumat yayıb.

Bildirilib ki, Azərbaycanla Gürcüstan dövlət sərhədində yük nəqliyyat vasitələrinin yaranan sıxlığı ilə əlaqədar olaraq Azərbaycan və Gürcüstan gömrük xidmətləri rəhbərliyi arasında müzakirələr aparılıb.

Sıxlığın aradan qaldırılması, sərhədkeçmə proseslərinin daha da sürətləndirilməsi üçün müvafiq zəruri tədbirlərin həyata keçirilməsi planlaşdırılıb.

Qeyd edək ki, Gürcüstanla Azərbaycan arasındakı "Qırmızı Körpü" sərhəd-keçid məntəqəsində Gürcüstandan Azərbaycana keçməyi gözləyən yük avtomobillərinin uzun növbəsi yaranıb. Sürücülərin sözlərinə görə, onlar günlərdir yoldadırlar və sərhədi keçmək üçün hələ ən azı dörd-beş gün gözləməli olacaqlar.

Gömrük-sərhəd buraxılış məntəqələrində çıxışda canlı növbədə olan yük nəqliyyat vasitələrinin sayı açıqlanıb.

Oxu.Az xəbər verir ki, bu barədə Azərbaycan Yerüstü Nəqliyyat Agentliyi (AYNA) məlumat yayıb.

Bildirilib ki, "Qırmızı Körpü" gömrük postunda hazırda 1030 yük nəqliyyat vasitəsi çıxışda gözləyir:

"İran İslam Respublikası ilə sərhəddə yerləşən "Astara" gömrük postunda isə 37 nəqliyyat vasitəsi növbədədir.

Azərbaycanın Rusiya ilə sərhədində yerləşən "Samur" gömrük postunda isə 47 yük maşını növbədə gözləyir".

Azərbaycanda bəzi qurum və təşkilatların istifadəçi hesablarına kiberhücum cəhdləri qeydə alınıb.

Oxu.Az xəbər verir ki, bu barədə Milli Kibertəhlükəsizlik Agentliyi (MKA) məlumat yayıb.

Bildirilib ki, kiberhücumçular istifadəçi hesablarına icazəsiz girişi müxtəlif üsullarla həyata keçirirlər. Onlar xarici IP ünvanlarla yanaşı, trafikini Azərbaycan ərazisindən daxil olan legitim bağlantı kimi göstərmək və mümkün coğrafi məhdudiyyətlərdən yayınmaq məqsədilə Azərbaycan IP ünvanları təqdim edən VPN və proksi infrastrukturlarından da istifadə edirlər.

Kiberhücumların əsas məqsədi "Microsoft 365", eləcə də digər e-poçt mühitlərinə icazəsiz giriş əldə etməklə qurum və təşkilatlara məxsus məxfi məlumatların, elektron yazışmaların və digər həssas məlumatların ələ keçirilməsindən ibarətdir.

Bununla əlaqədar, Milli CERT təşkilat və qurumlara istifadəçi hesablarının təhlükəsizliyini gücləndirmək məqsədilə aşağıdakı tədbirləri həyata keçirməyi tövsiyə edir: giriş loqlarının yoxlanılması, xüsusilə eyni gün ərzində həm xarici ölkələrdən, həm də Azərbaycan IP ünvanlarından qeydə alınmış girişlərin təhlil edilməsi; eyni mənbədən çoxsaylı hesaba qarşı uğursuz giriş cəhdlərinin araşdırılması; şübhəli uğurlu girişlərin müəyyən edilməsi; bütün istifadəçi hesabları üzrə çoxfaktorlu autentifikasiyanın (MFA) aktivləşdirilməsi.

Müşahidə olunan fəaliyyətlə əlaqələndirilən hücum indikatorlar (IOC) aşağıdakılardır:

146.70.247[.]20

179.43.158[.]195

130.94.80[.]141

94.20.154[.]138

35.178.160[.]238